महाराष्ट्रात वादळी पावसाचा इशारा : पुढील ५ दिवस धुमाकूळ
राज्यात पुढील काही दिवस जोरदार पावसाची शक्यता असल्याचा इशारा भारतीय हवामान विभागाने दिला आहे. काही भागांमध्ये पाऊस इतका मुसळधार असेल की समोरचं काही दिसणार नाही, अशी स्थिती निर्माण होऊ शकते. त्यामुळे नागरिकांनी खबरदारी घेण्याचे आवाहन करण्यात आले आहे.
मुंबई, कोकण आणि पश्चिम महाराष्ट्रात पावसाचा जोर
गेल्या २४ तासांपासून मुंबई, कोकण आणि मध्य महाराष्ट्रात पावसाने हजेरी लावली आहे. पश्चिम महाराष्ट्रातही ही स्थिती पुढील काही दिवस कायम राहणार आहे. हवामान विभागाने स्पष्ट केलं आहे की राज्याच्या बहुतांश भागांमध्ये पुढील चार ते पाच दिवस पावसाची हजेरी असेल.
कोणत्या भागांना अधिक धोका?
हवामान विभागाच्या अंदाजानुसार, नाशिक, अहिल्यानगर (नगर), सातारा, पुणे, कोल्हापूर या भागांमध्ये वादळी पावसाचा तडाखा बसण्याची शक्यता आहे. विदर्भ, मराठवाडा आणि कोकण पट्टाही या पावसापासून वाचू शकणार नाही. कोकण आणि मध्य महाराष्ट्रासाठी ‘ऑरेंज अलर्ट’ जारी करण्यात आला आहे, तर पश्चिम महाराष्ट्रात ‘यलो अलर्ट’ दिला गेला आहे.
चक्राकार वाऱ्यामुळे पावसाला पोषक स्थिती
सध्या अरबी समुद्रात गुजरात व उत्तर कोकणच्या किनाऱ्यालगत चक्राकार वारे वाहत आहेत. या वाऱ्यांमुळे पावसाला पोषक वातावरण तयार झालं आहे. त्यामुळे राज्यात मेघगर्जनेसह व विजांच्या कडकडाटासह पावसाचा जोर वाढण्याची शक्यता आहे. हवामान विभागाच्या अंदाजानुसार, हा पाऊस किमान २१ मेपर्यंत कायम राहण्याची शक्यता आहे.
शेतकऱ्यांसाठी चिंता वाढली
राज्यात अनेक भागांमध्ये अवकाळी पावसामुळे शेतपिकं आणि फळबागांचे मोठ्या प्रमाणात नुकसान होत आहे. विशेषतः पुणे जिल्हा आणि घाट परिसरात पुढील दोन दिवस हलक्यापासून मध्यम स्वरूपाचा पाऊस पडेल, असा इशाराही देण्यात आला आहे. त्यामुळे शेतकऱ्यांनी काळजी घेणे आवश्यक आहे.
हवामान विभागाने दिलेल्या इशाऱ्यानुसार नागरिकांनी घराबाहेर पडताना खबरदारी घ्यावी, विशेषतः घाट भागात आणि शहरांत पावसामुळे वाहतुकीवर परिणाम होण्याची शक्यता आहे.